Aquí aparecerán los Resultados de su búsqueda personalizada....

SEMANA SANTA PARAGUAY: El evangelio y la homilía del Martes Santo en guaraní



Aquí les dejo el audio para practicar en guaraní:




Juan 13, 21-33. 36-38.
Jesús oguapy mesápe hembimbo’e kuérandive, oñandu tuicha oguapýva hese, ha he’i opavave ohendu haguã:
–Añetehápe ha’e peẽme, peteĩva pende apytégui che moñuhãta hína.
Umi hemimbo’e kuéra omañamba ojuehe, ha’e kuéra ndoikuaaígui mávarepa oñe’ẽ. Pe hemimbo’e Jesús ohayhuvéva oguapy hína Jesús ykére okarupa aja hikuái, ha Simón Pedro oñatõi chupe oporandu haguã Jesúspe mávarepa oñe’ẽ hína. Oñembojave ha’e Jesús rehe ha oporandu chupe:
–Che Jára, máva piko hína?
Jesús he’i chupe:
–Amyakỹta peteĩ mbuja pehẽngue ha upe ame’ẽvape, upéva hína.
Upepete omyakỹ peteĩ mbuja pehẽngue ha ombohasa Judas, Simón Iscariote ra’ýpe. Ha Judas ipojáivo pe mbuja pehẽnguére, Aña oike ipy’apýpe. Jesús he’i chupe:
–Upe rejapótava kena pya’e ejapo.
Ha avave umi mesápe oguapýva okaru, ndoikuaái mba’érepa Jesús oñe’ẽ chupe péicha. Ha Judas pópe oĩgui viru ryru, oĩ oimo’ãva Jesús he’i hague chupe oho haguã ojogua oñekotevẽva pe areterã, térã ome’ẽ haguã mboriahúpe.
Ha Judas ho’u pe mbuja pehẽngue, ha upéi osẽ oho. Pyharéma upérõ.
Judas osẽ rire oho, Jesús he’i:
–Ko’ágã che, yvypóraicha aju vaekue ko yvy ári, ajehechauka che tuichaha. Ha che rupi Tupã ojehechauka ha’e tuichaha. Ha che, yvypóraicha aju vaekue, ahechauka ramo mba’éichapa Tupã tuicha, Tupã avei ohechaukáta mba’éichapa che tuicha che. Ha voiete péicha ojapóta. Che ra’y kuéra, nda che are mo’ã véima pene ndive. Peẽ che rekáta ágã, ha ha’e haguéicha umi myakãhára kuérape ha’e avei peẽme ko’ágã: Che ahatahápe peẽ ndaikatúi peho. Simón Pedro oporandu Jesúspe: –Che Jára, moõ piko rehóta?
Jesús he’i chupe: –Che ahatahápe ndaikatúi ko’ágã reju che ndive. Upe rirénte rejúta.
Pedro he’i chupe: –Che Jára, mba’ére piko ndaikatu mo’ãi aha nde ndive ko’ágã? Che niko aime amano haguã nde rehe.
Jesús he’i chupe: –Añete piko ere remanóne haguã che rehe? Añete guánte ha’e ndéve: gállo osapukái mboyve, eréta nda che kuaaiha mbohapy jey.
Ñandejára Jesucristo ñe’ẽ
ÑAMBOGUEJY ÑANDE REKOVÉPE (la homilía)
Ñane kontrário niko ñane ra’ã ñande reity ñuhãme, oguasu api ñande rehe, térã ñane ra’arõ tape po’ípe, pévagui jakyhyje ha jaiko ñama’ẽ mombyry ani haguã ja’a ipópe.
Pe ñande roguaygua, ñane irũ ha ñane hénte kuéragui katu nañaha’arõiete voi umíva, ha péicha hágui jaikuaa mba’éramo ñane irũ, ñande rógaygua opu’ãha ñande rehe kañyháme, péva tuichaiterei oguapy ñande rehe, ñambyasy ha ñanembohasy.
Hesu oikuaa Judas, iñirũ peteĩ, ome’ẽtaha chupe hepýre mburuvicha pópe ojejuka haguã, ha péva ombopohyive ijehasa asy, Judas ha’e rupi peteĩ iñirũ ha’ete voi oiporavo ha ohenói va’ekue oiko haguã hendive.
Ñande ha’éva cristiano, ñande karaíva Ñandejára rérape, ñaiméva Hesu ndive, tekotevẽ ñama’ẽ noiméipa avei ñatraiciona ñaína Hesúpe, noiméipa hepýre ñambotapykue ñande jerovia, noiméipa jajeity ñande Iglesia, pa’i, hermana, obispo, catequista kuéra apére, ñe’ẽ, térã tembiapópe ñambyai haguãicha. Hesu he’i va’ekue hemimbo’e kuérape, upe pende rehe opu’ãva, che rehe opu’ã.

No hay comentarios:

Publicar un comentario

La mayoría de los usuarios están comentando esto en facebook:

https://www.facebook.com/alparaguay

Nota: solo los miembros de este blog pueden publicar comentarios.

Related Posts Plugin for WordPress, Blogger...